الريس عايش بصوته

فى يوم تاريخى داخل السنة الطويلة العريضة المسماة 2011 و هى سنة المفاجأت و كل ما يخطر و لا يخطر على بالك .. خرج الرئيس مبارك الذى فضل التخلي عن عن منصب رئيس الجمهورية.. من أجل مصالح الوطن و خاطر عيون أبنائه من شعب مصر و ليس لصالح جمال و علاء لا سمح الله .. خرج الرئيس بصوته يخطب فينا بصورة تجمع بين التهديد و الوعيد و العتاب.

بالنسبة للعتاب فالرئيس مبارك الذى يسكن فى شرم الشيخ حاليا تحز فى نفسيته ما يلقاه هو و الأسرة الكريمة من إدعاءات كاذبة بشأن ثروتهم المالية التى لا يوجد منها و لا مليم فى بنوك خارج مصر و أن كل ما أشيع هو نوع من التصريحات الفشنكية التى لا تتكلم عن الحقيقة.

أما التهديد و الوعيد فهى تأكيدات الريس المتخلى مبارك أنه يحتفظ بحقه القانونى  (( تجاه كل من تعمد النيل مني ومن سمعتي ومن سمعة أسرتي بالداخل وبالخارج)).

تعالوا حضراتكم فى دقائق بسيطة نعمل كشف حساب .. لا سمح الله لا يتعلق بممتلكات الريس و لكن كشف حساب عن 30 سنة سعادته كان قائدا للسفينة التى نسير بها.

انزل على أى محطة أوتوبيس و شوف فى عيون الناس و هى تكلمك من غير ما تطلب و ستعرف جيدا ما تشكو منه.

شوف أى واحد حر يتحدث بآرائه و ما كان يحدث له إذا دخل السجن و ما كان لا يحدث له إذا لم يتخط عتبة السجن .. فهو فى هذه الحالة يقول ما يقول عن فساد يصل لفوق الركب بشبرين لكن الدولة فى حكمها تصنع ما تريد .. يعنى ببساطة .. اتكلموا و بعبعوا و احنا هنعمل اللى عايزينه.

شوف الأمراض التى انتشرت تأكل فى أجساد المصريين و سبحان الله كانوا راضيين على ما بلاهم و كل أمانيهم الستر.. واحد يطلع و يقولك ده قدر ربنا .. بس واجب الحاكم يوفر حياة كريمة للمحكومين تساعدهم على ما بلاهم.

شوف الناس التى تعيش فى بيوت لا هى تنتنمى للمساكن الحيوانية و لكنها ما هى إلا بيوت تصلح للمقابر .. و هذا كرم من الحاكم الذى يوفر عليك طريقك إلى الآخرة فتجد مأوى لعظامك الكريمة.

و اشرب و اشرب و اشرب و المياه لا تزال ملوثة و هنعمل ايه .. الحكومة مش بايديها كل حاجة .. و ده توفير لعددكم .. يعنى تموتوا و تتخف رجليكم من الدنيا و يبقى حلينا الزيادة السكانية .. يا أخى حل وسطكم و أنتم تغنون بحجة غيرنا استطاع أن يستغلها فى البناء و التعمير و الإنتاج و الصناعة و لنا فى الهند و الصين بأعدادهم البشرية المهولة أسوة حسنة.

مفيش موارد و اللى جاى قد اللى رايح و يدوب نعرف نعمل موازنة عامة كل سنة .. و يعيش حبة من الناس على قفا جموع الناس و اللى مش عاجبه يشرب من البحر.

ما علينا .. نعمل هدف قومى نمشى عليه و ندعمه و تمام يا رجالة .. هدفنا القومى اللى لازم نتبناه هو استضافة كأس العالم .. و صفر كبير مع بوسة على القفا و نقول معلش .. هدفنا نحافظ على أمم أفريقيا .. و يللا العب .. شوط .. هوووب .. جوووووووول .. و برقية تهنئة و زى ما قال الريس منتخبنا كويس.

تعالى بقى نتكلم عن مشروع الضبعة .. لأ يا عم خليها سياحة و منتجعات و خلى الأجانب تهيص.

سيبك من الضبعة و نمسك فى مشروع الدكتور فاروق الباز و نعمر الصحراء الجرداء و نحل مشاكلنا .. لأ يا سيدى البلد فقيرة و لازم نعمل لجنة تعاين و تشوف .. و لا احنا هندفع كده من غير ضمانات .. و اعمل دراسات و أبحاث يا دكتور فاروق .. و الراجل يسهر و هو فاكر إنه بيخدم البلد لكن لا حياة لمن يحكمون .. طظ فى المشروع.

و غيرها من الحكاوى اللى ممكن تسمعها و تشوفها و تحضرها بنفسك و تعرف قد إيه إدانا الحاكم و اتبرع لنا بالغالى و الرخيص و أخر جمايله تخليه عن الحكم.

شوف بقى أنت و هو .. الريس تحت إقامة جبرية أه .. لكن عنده قدرة يرجع يخطب زى زمان.. زيه زى القذافى بالصوت..ونفس الحال زى بن لادن و خطاباته.

فعلى ضفاف مياه شرم الشيخ الساحرة يرسل لنا الريس نصا صوتيا من داخل قصره و علينا هنا أن نعود لأمريكا.

نعم .. لابد من العودة لأمريكا .. فإذا كانت أمريكا تحلل صوت بن لادن عندما يظهر فيجب هنا أن نحلل وعى الرئيس .. هل هو يعتقد أننا نريد محاكمته على أموال فقط أم نريد محاكمته على قتل لأناس أبرار خرجوا يدافعون عن الحرية؟

حرية قدمت لنا مزيفة و عندما ينتشر الاستبداد و يشعر القائم على الأمور أن الحرية تهدد عرشه فهنا يجب قمع و قتل المنادى بالحرية و هذا ما تشهد عليه مصر بترابها الذى ارتوى بدماء الشهداء فى ثورة 25 يناير.

شوفنا انتخابات معروف الكسبان فيها قبل الانتخابات ما تتعمل .. و ليا طلب بقى طالما إن الناجحين كانوا ناجحين غصب عن عين التخين .. فيبقى عيب نضيع فلوسها فى دعاية و شنط زيت و سكر و حتى يبقى ده سفه و إهدار للمال السايب المرطرط عندكم.. و لا لازم نمثل على الناس و نغنى عليهم.

انتخابات تعبر عن فساد سياسى شهرته النزاهة و الشفافية .. نزيهة الانتخابات .. نزيهة اللجان .. نزيهة اتجوزت بعد فرحتكم بالانتخابات يا مفسدين مصر سياسيا.

النص الصوتى للرئيس مبارك المتخلى الذى لا يدرك أن الثورة هى التى أقصته عن منصبه و ليس هو بكرمه و عطفه الذى أراد لنا الخير .. فظهوره على قناة العربية صوتا ما هو إلا خدمة للثورة المضادة.

و بالنسبة لحكاية الإقامة الجبرية .. فالريس شكله جامد و لا بتفرق معاه .. علطول بالبريد الالكترونى يبعت على قناة العربية و بعد ما سمعنا الخطاب "العاتيفى" تحب نذيع ..ذيع.. يبقى ذيع.

و ليه بريد الكترونى ؟؟ ما هو ممكن نعمل جو دراما .. و واحد يتطوع من بتوع بنحبك يا ريس و أسفين يا كبير .. يحضر يوم التسجيل ثم يأخذ الشريط و يخبئه حتى لا يحصل عليه أحد .. و شوف بقى الشرطة تواجدها يدوب فى الشارع .. تيجى لجنة تقع فى حظ مهرب الشريط و يتوتر و موسيقى تصويرية حزينة .. و لقطة close على عيون الهارب و وشه المتوتر.. و بعد التفتيش و المرور بسلام .. كمل أنت الحكاية كما يحلو لك.

صوتك حلو يا ريس و يبقى أحلى لو حد متخصص فى القانون يقول لى .. يعنى إيه أقدم مكاتبات تساعد النائب وزارة الخارجية الإرسال لبلاد الله الأجنبية الكشف عن أموال الريس؟

يعنى لازم الريس يوافق و يسمح بمكاتبات و لا إيه؟

الثقة حلوة و الريس ختم كلامه بنبرة و عبارة مليانة ثقة فى البراءة و عايز أعرف بقى من الست هيلارى وزيرة خارجية أمريكا .. هو مش من كام يوم حكيتى بعضمة لسانك إن ممكن مصر تبعت طلب و تطلب فلوس الريس اللى عندها .. و لا ده استعباط لا سمح الله و استخفاف بمعلوماتك يا هيلارى.

رحمتك يا رب و احمى البلد و أرزقنا الخير.