كدبة ابريل

لأننا نستقبل شهر أبريل في بداية أيامه فلابد من الترحيب به و ذكر مجموعة من الخيالات التى تتناسب معه.

فهو شهر معروف بالكذب و يطلق على أى حاجة أونطة فيه اسم (كدبة أبريل) و لهذه المناسبة حبيت أهديلك حبة منهم:

·      طوابير بالعشرات من البنى ادمين على محلات الجزارة و عربيات الفول واقفة لا بتهش و لا بتنش من قلة الزباين.

·      كل مصر نظيفة "من الزبالة".

·      مركز شباب الجزيرة ياخد الدورى.

·      إنشاء جامعة الدكتور زويل و افتتاحها و نشر أول أبحاثها فى كبرى المجلات العلمية العالمية.

·      لجنة "الحكام" ينصلح حالها في اتحاد "الكوسة".

·      إصدار قانون محاكمة الوزراء.

·      تنفيذ مشروع "ممر التنمية و التعمير" للدكتور فاروق الباز.

·      حل الصراع الفلسطينى الفلسطينى.

·      الولايات المتحدة الأمريكية و روسيا يتخليان عن أسلحتهما النووية.

·      التعليم المصري بخير.

·      حل القضية الفلسطينية و تفعيل قرارات كل القمم العربية بجد مش ع الورق.

·      اعتراف اسرائيل بكل مجازرها ضد الفلسطينيين.

·      كل مصر متعلمة.

·      الدكتور البرادعى هو المرشح القادم و ليس المحتمل لانتخابات الرئاسة المصرية.

·      إنشاء نقابة للإعلاميين.

·      اختفاء الطوابير من المستشفيات الحكومية.

·      مصر تعيش فى سيولة مرورية مريحة بلا أى زحام.

·      التزام ركاب المترو بأبواب الصعود و النزول.

·      سواق التاكسى يقف لك و يوصلك مطرح ما انت عايز.

·      الناس كلها مبسوطة.

·      الناس كلها زعلانة.

·      انخفاض نسبة العنوسة فى مصر و قلة معدلات الطلاق.

·      الشباب المصرى يمتلك وظائف بمرتبات خيالية يحسده الأمريكان عليها.

·      إلغاء حالة الطوارىء.

·      لا إهمال فى المستشفيات.

·      الدروس الخصوصية في ذمة الله.

·      إقامة حفل تكريم لكل باحث علمي خدم مصر.

·      شيوخ الفضائيات المتشددين يمتنعون عن الظهور على الشاشات.

·      مصر تصعد لكأس العالم.

·      دويتو غنائى بين عمرو دياب و محمد منير.

·      اختفاء كرومبو في ظروف غامضة.

·      مصر تعتمد فى اقتصادها على صناعتها الوطنية دون أى معونات خارجية.

·      خدمة العملاء بالشركات تقرر الرد على المتصلين دون تشغيل أغانى للانتظار.

·      الناس ماشية بسلام على كل رصيف فى مصر من غير أى اشغالات.

·      تعديل مواد الدستور.

·      الحزب الوطنى يفقد جميع المقاعد فى مجلس الشعب.

·      صناعة أول سيارة مصرية كاملة.

·      الجرائد القومية بتنقل الحقيقة كلها.

·      الجرائد الخاصة بتنقل الحقيقة كلها.

·      كل الناس صادقة.

·      اختفاء الشيشة من المقاهى المصرية.

·      الصرف الصحى واصل لكل حتة فى مصر.

·      انقطاع الكهرباء فى جاردن سيتى و مصر الجديدة لأكثر من مرة فى اليوم.

·      المواصلات فى مصر فاضية و مش لاقية حد يركبها.

·      إغلاق موقع الفيس بوك.

·      مفيش فقير فى مصر.

·      هيفاء وهبى تقرر ان تبوس الواوا لكل مختل عقلى يرى زوجته شبه الهيفا.

·      لا أطفال شوارع فى مصر.

·      الشعب المصرى يعادل الفرنسيين فى قراءة 10 كتب سنويا.

·      زيارة البرادعى للريس لتهنئته بالعودة من ألمانيا سالما.

·      المستشار جودت الملط يعلن براءة الحكومة من أية مخالفات.

·      أحمد عز يرفض احتكار أدوار البطولة.

·      الكدب مالوش رجلين لأنه مش موجود أصلا.

·      اللى نفسه فى حاجة يعملها.

·      اللى تحبها تتجوزها.

·      اللى تحبيه يسعدك.

ملحوظة يا عزيزى أخر نقطتين بصدق مش كلامى.. و أشوفك على خير..و ادعيلى بس من قلبك.

طفوا النور

أكتب إليكم الآن باحثا عن النور السعيد في حياتنا فهل هو موجود أم أن الحياة أصبحت مظلمة من كثرة ما نراه و نسمعه و نعيشه؟

الحياة مليئة بالمتناقضات فلا يوجد شىء فى هذه الدنيا يطغى على الآخر فالخير أمامه الشر و الجمال يلازمه القبح و الذل يواجه الكرامة و الأهلى ينافسه الزمالك.

أحمد الله على اختراع الكهرباء الذي سهل لنا الحياة و أضاء لنا الكون و أصبح لدينا التليفزيون و الراديو و الانترنت و المطابع و المخترعات المفيدة جميعها و التى تعمل بالكهرباء.

و لولا الكهرباء لما كان هناك علاج لمن ضاع عقله و لولا الكهرباء لما كان هناك دم لمن يحتاجه بالمستشفيات و لولا الكهرباء لما كنت أنت تقرأ المكتوب.

Earth Hour أو ما يطلقون عليه ساعة الأرض دعوة كى يتذكر الناس ضرورة ترشيد استهلاك الكهرباء و ذلك بإطفاء الأنوار لمدة ساعة لحماية الكوكب الأزرق من الاحتباس الحرارى الذى نعانى منه الآن فى مصر.

و بمناسبة الاحتباس الحراري و الجو البارد الحار الذى أصبحنا نعيش فيه فإنني أتعجب من كتب المدرسة التى كانت تشير إلى أن جو مصر معتدل صيفا و دافىء شتاء.

و ينطبق هذا الجو على من يمتلك قدرة مالية على الذهاب للمصيف فى المدن الساحلية و الجلوس بالشهور فى الشاليهات و الذهاب لقضاء الشتاء فى الأقصر و أسوان أو أن الكريم أعطاه ميزة السكن فى تلك المناطق المذكورة.

فجو مصر خصوصا فى القاهرة أصبح جوا لا يطاق فهو حار جدا و بارد جدا و لا اعتدال إلا فى نظر السائحين الذين يتمتعون بصحة تجعلهم يرتدون أخف الملابس فى الشتاء عندنا و أنت تمشى بجوارهم مرتديا كوفية طابقة على زمارة رقبتك و جاكت عايم فيه و ما وراء الجاكت كان اعظم.

نعود سريعا لموضوع ساعة الأرض تخيل أننا نطفىء فى حياتنا السىء و لا نسلط عليه الضوء فهل سينتشر بيننا لأننا لا نواجهه أم انه سيموت لأننا لا نهتم به؟

و هذا ما يدفعنا للحديث عن فكرة نصف الكوب و انظر للكوب كله و لا تنظر للفارغ فقط.

إيه رأيك لو تخيلنا ساعة مظلمة و نحن بلا أضواء بعيدا عن أي هالات أو ظلال.

تخيل فى هذه الساعة المظلمة أنك لا ترى رغم نعمة البصر التى منحها الله إليك لكن أحيانا ترى القلوب و تعمى الأبصار.

هل نحن نرى أم مجرد مشاهدين لما يدور حولنا دون أن كون لنا دور و لو حتى بالكلام و أضعف الإيمان.

تخيل أن ساعة مظلمة يمكن أن تغير حياتك تجعلك تفكر فى ترك المساوىء و الاتجاه نحو الأفضل.

ساعة مظلمة تحاسب فيها نفسك و تقرر التغيير من أجل المصلحة العامة و ليس من أجلك أنت.

ساعة مظلمة تفكر فى الآخرين الذين حرمهم الله من نور البصر لكنهم حمدوا الله و قدموا لنا النماذج العظيمة كالدكتور طه حسين.

ساعة مظلمة تعرف فيها أن هناك من لا يجد طعاما أو شرابا و لا يرى ليلا لعدم وجود الكهرباء و يشترى ملابسا جديدة كل فين و فين، و خالص تحياتى لمن تنقطع الكهرباء لديه دوما او محروم منها بالأساس فهو أول من يشارك فى ساعة الأرض دون دعوة من أحد.

ساعة مظلمة عندما تقترب من نهايتها تسعى وقتها لأن لا ترى كل فاسد لا يستحق الوجود فى الحياة و ما أكثرهم.

ساعة مظلمة لحماية الكوكب الأزرق و ساعة مظلمة أخشى أن ننسى فيها الوقفة المصرية بحيث يستغل البعض هذه الساعة فى زيادتنا واحد و ربنا يزيد و يبارك.

حالة زهق

فيها ايه لو عملت كشف حساب لنفسك سواء يومي أو أسبوعى أو حتى سنوى، تشوف فيه زعلت مين؟ ضايقت مين؟ عملت إيه يفرحك؟

اى حاجة عدت عليك شوف حصلك إيه و اتصرفت ازاى؟

بينى و بينك من صغرى بحس انى ممكن أموت بدري بدري بس جه فى بالى إننا دايما نذكر الميت بعد موته بكل الصفات الحلوة أو الوحشة على حسب سيرته في الدنيا.

تعالى ناخد الجانب الحلو و أسألك ليه دايما نهتم بالميت بعد ما يبعد عننا و نذكر محاسنه لكن و هو عايش ما نجيبش سيرته.

يا ترى إيه الفايدة لما يكون على حياة عينه عايش و ما حدش فاكره بكلمة حلوة و بعد ما يموت نقعد نتكلم و نقول و نعيد و نزيد و نحكى و لا قصص ألف ليلة و ليلة.

مش البنى آدم ده ساعات تيجى عليه حالة زهق مش عارف يتكلم مع مين و لو اتكلم مع حد بيرتاح له و بلسانه (يلوش) فى اللى بيرتاح معاه!!

غريبة دي.. تتكلم بأى كلام مع القريب منك و من جواك فاكره هيستحملك..لكنه مش بيستحمل كلامك لو معجبهوش.

يعنى تتكلم و انت فاكر انه هيرضى بكلامك و هو يسمعك و فاكر انك هتقول اللى يرضيه و كل واحد و عشمه و ما حدش عارف يرضى التانى!!

لخبطة .. صح؟

تعالى لموضوعنا اشمعنا نفتكر الميت لما نمشى و نعرف قيمته بجد لما يروح و لما يكون جنبنا مش بنفتكره بكلمة حلوة؟

طب ايه رايك لو لقيت البنى ادم ده ذات نفسه رافض انك تقول عليه كلمة حلوة و هو عايش لان بكلامك و انت بتسرد اللى عمله فاكر انك كده (بتفوّل) عليه و يقولك: فال الله و لا فالك يا شيخ.

مشكلة صح؟

بس أقولك أنا عندى أعرف كل حاجة و أنا عايش و اشوف الناس بتقول إيه بالحلو و الوحش عليا أحسن ما أموت و معرفش و لا حاجة.

بس نعمل ايه؟

ما هى كل حاجة محتاجة لحل و احنا بندور عليه و لا البحث عن مرتكب جرائم يكشفها المفعوص كرومبو.

لو عرفت الحل يا بختك..لأن التوهان حاجة بايخة اوى.

ما تزعلش منى..شكلي عكننت عليك و أنت متعود منى تيجى تضحك و تمشى، و ممكن تقعد تعلق و تاخد و تدى.

بس النهارده العملية ملخبطة يا صديقى ما تزعلش بقى لازم نتفق احنا سوا ع الحلوة و الحادقة.

لحمة يا دنيا لحمة

مش عارف ابتدى منين؟

الموضوع و ما فيه إن اللحمة وصل سعرها لفوق عقبال أملتك سعرها 60 جنيه.

الأسعار طالعة فى العلالى و ما حدش عارف هو الغلاء عندنا بس و لا دى حالة عالمية؟

طبعا فى ناس هيخرجوا بتصريحات و يقولك دي أزمة عالمية بمعنى إنه "كاس و داير على الكل".

على عينى و على راسى إن الأسعار الغالية لكن هو مفيش مرة نسمع إن فى حاجة رخصت؟

ولا بس النفوس بترخص؟

اللحمة مصدر بهجة و سعادة من الكفتة إلى الطرب إلى البوفتيك إلى ما شاء الكريم حاجة أخر منجهة.

لو بصيت لعلاقة شعبنا باللحمة هتلاقي رباط مقدس بين الطرفين يظهر فى مواقف زى:

·      لو واحد حصلت له حاجة فرحته و كان ربنا كارمه و مقتدر علطول يدبح و يفرق على الغلابة.

·      لو واحدة عاملة "ندر" لله و اتحقق لها المراد، علطول تفرق عيش و لحمة.

دى حاجة بسيطة كتبت منها على ما قسم اللى افتكرته.

بمناسبة موضوع اللحمة فى ناس شايفة إنه مش ضرورى نشترى لحمة لأن الحياة مش هتقف عندها و ممكن نعوض بفراخ و سمك وكله عند الشعب بروتينات من خيرات الله و بارك العظيم فيما رزق.

فنهر النيل حتت منه مفتوحة على صرف صحى و الفراخ عندها انفلونزا بس الحالة و الحمدلله مستقرة.

فيها إيه يا سيدى لو ماكلتش لحمة و لا فراخ و لا سمك و زيك زى الغلابة تقضيها فول و طعمية؟

طيب لو بحسبة بسيطة سانودتش الفول بــ"جنيه" و الطعمية شارحه، تخيل بقى لو أسرة بسيطة فقيرة في الفلوس عزيزة فى النفوس قرروا يفطروا و يتغدوا و يتعشوا فول و طعمية بجانب بقى سلاطتهم،شوف هيدفعوا قد إيه؟

و ده أكل "فقايرى" يعنى لا "ذفر" و لا يحزنون.

سيبك بقى من اللحمة و من الفول و الطعمية و إيه رأيك لو بقيت نباتى يعنى تعيش على النباتات لا لحوم و لا حاجة؟

و منها تريح معدتك من التحمير و المسبك و تريح جيبك إلى حين نزول أسعار اللحمة إلى قواعدها سلامة.

تصدق بالله الموضوع محير، لا إحنا عارفين نشترى اللحمة و لا نقاطع الجزارين و لا نبقى نباتيين؟

طبعا اللى هيشترى ده أكيد عايش فى و مترفه و عنده عربية و أملاك.

و فيه هيشترى لأن العيال نفسهم فيها و فيه هيريح دماغه و يشوف حظك اليوم و ساعتها هيكون مكتوب (لحمة فى الطريق إاليك).

لا تندهش فستكون اللحمة كالمفاجأة و يا خوفى يا بدران لا تقعد اللحمة تطلع بسعرها لحد ما تبقى زى جرام الدهب و ساعتها لا بيوت هتتفتح و لا هيبقى فيه ستات بيوت شاطرة تعرفهم من طعم "الفتة".

نرجع لموضوعنا يا ترى تحب تعوض اللحمة بالفول و الإجابة هتلاقيها فى كلام عمنا (أحمد فؤاد نجم) حيث قال:

·      عن موضوع الفول واللحمة صرح مصدر قال مسئول
إن الطب اتقدم جدا والدكتور محسن بيقول
إن الشعب المصري خصوصا من مصلحته يقرش فول
حيث الفول المصري عموما يجعل من بني ادم غول
تأكل فخده في ربع زكيبه والدكتور محسن مسئول
يديك طاقة وقوة عجيبة تسمن جدا تبقى مهول
ثم اضاف الدكتور محسن إن اللحمه دي سم أكيد
بتزود أوجاع المعدة وتعود على طولة الايد
وتنيم بني ادم وتفرقع منه المواعيد
واللي بياكلوا اللحمة عموما حيخشوا جهنم تأبيد
يادكتور محسن يامزقلط يامصدر ياغير مسئول
حيث إن انتو عقول العالم والعالم محتاج لعقول
ما رأى جنابك وجنابهم فيه واحد مجنون بيقول
إحنا سيبونا نموت باللحمة وانتو تعيشوا وتاكلوا الفول .

أظن مفيش بعد الكلام تتأكد من الرباط المقدس مع اللحمة .

نسيت أقولك إن بعضهم قال إن سبب ارتفاع سعر اللحمة هو إن (وديع) و (تهامى) لموا كل اللحمة اللى فى السوق عشان خاطر فيلم "لحم رخيص". . و لحمة يا دنيا لحمة.

تتربى فى عزك يا ريس

10 أيام يا ريس عدوا علينا من غيرك و كأنهم 100 سنة لكن شافاك الله و عافك و يرجعك لنا بالسلامة من ألمانيا.

البلد هنا تمام التمام يا ريس و الطلبة بتوعنا فى الثانوية بيمتنحوا امتحانات بعضها اتسرب و البعض منها جت فيها أسئلة من خارج الترم الأول بس سيادتك دى امتحانات (تجريبة) يعنى مفيش قلق منها.

بالنسبة لمرض النقرس يا ريس فهو ممكن يختفى من عندنا لأن بعد سفر سيادتك اللحمة وصلت لــ 60 جنيه الكيلو و لسه مدخلناش فى مواسم أعياد و لا يحزنون.

الغريب بقى إن بعد ما حضرتك سافرت حصلت أزمة سولار و اختفى، عشان ما حدش يستغل فرصة غياب حضرتك و يولعها بس الحمدلله جت الولعة فى اللحمة.

بخصوص أحزاب المعارضة فهي عملت مؤتمر فى فندق كبير و قررت المعارضة تدخل معارضة مع المعارضة و مفيش برادعى سيادتك على أجندتهم.

بخصوص البرادعى فقد أعلن معارضته لسياسة القمع ضد مؤيديه بالفيوم و قرر النائب العام فى غياب سيادتك فتح تحقيق لهذه الوقائع و ده دليل إن ماحدش فوق القانون.

نسيت أقولك يا ريس إن البرادعى فى كوريا و حسن شحاتة وافق على اللعب مع كوريا مباراة ودية "يا محاسن الصدف".

بمناسبة سيرة الكورة فالدورى مولع و الأهلى الأول و الزمالك و الاسماعيلى بيتنافسوا معاه بس المشكلة فى لجنة الحكام سيادتك و بيقولوا انه بيجامل الشرطة.

حبيت أأكد على حضرتك يا ريس إن الحالة ميسورة و الناس عارفة تتجوز تانى و تالت و هتلاقى سيادتك خبر يفرحك لما تعرف إن عم احمد اللى عدى الــ 100 سنة ربنا يديله الصحة اتجوز للمرة التالتة و بيفكر سعادتك فى الرابعة و كله بأمر الله .

عم أحمد ساكن فى سوهاج.

فى برنامج جديد ظهر يا ريس اسمه (مصر النهارده) بدل برنامج (البيت بيتك) و فى انتظار مكالمة من حضرتك للبرنامج عشان نطمن عليك يا ريس.

 (وديع و تهامى).. طبعا حضرتك مش فاكرهم يا ريس بحكم مشاغلك الكتيرة .. كان الله فى العون، المهم إن وديع و تهامى هيعملوا فيلم بعد سلسلة إعلاناتهم على قناة ميلودى و دى حاجة كويسة المهم ما نشوفش على الأفيش عبارة "للكبار فقط" اللى بتزعل حبايبنا.

خبر بقى عن الدكتور زويل خاص بعرض فيلم عن قصة حياته هيكتبه بلال فضل و يتبنى انتاجه الدكتور أحمد بهجت وعقبال ما حد يتبنى مشاريع الدكتور زويل العلمية.

الانترنت مرشح يا ريس للحصول على جائزة نوبل للسلام و فى نفس الوقت فى تقرير بيقول إن المصريين الأوائل عربيا و الــ23 عالميا فى الدخول على شبكة الفيس بوك لازم يحولوا الجايزة علينا، يا ريت يا ريس مش كفاية مفيش كأس عالم يبقى نروح السويد و ناخد نوبل.

الشباب يا ريس قايمين بمظاهرات عشان المسجد الأقصى فى كل جامعة بمصر و الأمن مستتب و كله تمام و بمناسبة سيرة النت.. فى حملة على الفيس بوك لمقاطعته من اجل نجدة الأقصى و ربنا يحميه من اى هدم يا رب و اللينك الخاص بالجروب مكتوب مع الرسالة عشان لو تحب تشارك فيها يا ريس

الأمور هنا مستقرة وكله علي ما يرام، الحمد لله الدكتور ماجد جورج أعلن إن مصر كلها هيكون فيها مياه نقية فى 2015 و ده شرف كبير للحكومة ننتظر حدوثه.

أسف يا ريس لو كنت طولت عليك و ترجع لنا بالسلامة إن شاء الله و يا ريت سيادتك توصل تهانينا للأستاذ جمال بمناسبة مولودته فريدة و تتربى فى عزك يا ريس.