وحوى يا وحوى

رمضان جانا و فرحنا به بعد غيابه و تم البدر بدرى و الأيام بتجرى و بالأمس كانت أول أيام الشهر الكريم و اليوم نحن في أواخره و غدا نستقبل العيد والأيام الحلوة بتعدى فى ثوانى.

و يا ترى آخر مرة اشتريت فيها فانوس كانت امتى؟

هل بعد 11 سبتمبر و لا بعد 11 أيلول؟

و فى كلا الحالتين رمضان كريم و سأحكى لكم عن صديقي عبد الحميد الذى قرر الخروج مع ابنه لشراء فانوس رمضان.

و كان سعيد ابن عبد الحميد يفرح بشراء الفانوس كل عام لكن هذا العام كما يقول عبد الحميد ظهرت تغيرات على ملامح سعيد و بدأ يسأله يعنى إيه وحوى يا وحوى؟

و بالطبع أجاب عبد الحميد بلغة الأب الفاهم الذى كان دائما يطلع الأول و يتفوق على جميع أقرانه فهكذا يركز الآباء بأنهم كانوا من الأوائل و عليك يا ابني تطلع احسن منى و يبدو فى كلمة عايزك تطلع احسن منى إنك تعوضه فى ترتيبه على الفصل و ربما ترتيبه أنه الأول عندما يقرر المدرس ترك الفصل و دعوة احد طلابه المهرة فى كتابة اسماء اللى بيتكلموا و اسم عبد الحميد يأتى فى مقدمتهم دائما بلا منازع.

المهم نعود لإجابة عبد الحميد التي أخبر فيها المحروس من العين سعيد أنه هذه الأغنية نغنيها من زمان و تدل على بهجة رمضان و السعادة بالشهر الكريم يا ابني.

و لم يقتنع سعيد بالأمر و قرر أن يلح فى سؤاله حتى يحصل على الإجابة التى ترضيه و يخبر عبد الحميد أن اسمه سعيد و معناه قادم من السعادة و الفرحة صح و لا لأ؟

و أخبرني عبد الحميد أنه هز رأسه ليس على واحدة و نص و لكن بالإيجاب على كلام المفعوص.

و بعدين يا بابا يبقى أنا ممكن أقولك يعنى إيه وحوى يا وحوى..يبقى معناها جاى من الوحوحة..أه مش أنت كل يوم تقول لماما الأسعار وحوحتنا.

سكت عبد الحميد و هو يحكى و كان يبدو عليه الفرح فابنه الذى لم يتجاوز السادسة فهم يعنى إيه وحوى بينما هو يدخل على 35 و لم يصل لمعنى وحوى.

فشخط فيه إزاى يا عم..أنت بتهرج أنت و ابنك..قال وحوى جاية من الوحوحة..هي بس الأسعار كلت عقلكم و بقيتوا تقولوا كلام و لا اللى واخد ضربة شمس.

قاطعنى عبد الحميد و أكمل حكايته فأخبرنى أن ابنه لم يمر عليه سوى يومين و كنا فى أواخر شهر شعبان حتى أخبرني انه غير مقتنع بالوحوحة التى أخرجها من القاموس اللغوى بمعرفته.

و قرر عبد الحميد أن يهدأ من روع الولد و يذهب به لشراء فانوس جديد يلهو به و يتلهى عنه و يريحه من سؤال:يعنى إيه و حوى يا وحوى؟

و أثناء سير الأب و الابن قررا الذهاب لصلاة المغرب فى المسجد المجاور لبيتهما قبل المرور على البائعين لشراء الفانوس.

و تمت الصلاة بعد الوضوء و انتظار الإقامة ثم خرجا إلى الشوارع المضاءة بأنوار تحتضن اوراق الزينة الملونة مربعات مشرشرة و مثلثات كالجبنة النستو.

و لأن سعيد مسحوب من لسانه حبتين كبقية الأطفال فكان كلما وقف أمام بائع سأله:عمو عمو..يعنى إيه وحوى يا وحوى؟

و طبعا لأن البائع دائما على حق عندنا فقط و ليس كبقية خلق الله.

فالبائع عندنا عندما تسأله على شىء و تريد مشاهدته يسألك هتشترى و لا هتتفرج؟

و تلاقى تناكة الدنيا كلها حطت على وشه لو قلت له:هشوف الأول و لو عجبتنى اشترى..و يقولك مفيش أو أهي قدامك زى ما أنت شايف فى الباترينة و يبقى نفسه كمان يقول مش هتشترى يبقى يللا هوينا.

ما علينا ربنا يسامح كل بائع و يهدى كل شارى و تبقى إشارة البائع و الشارى خضرا و مافيهاش يفتح الله.

رد البائع على سؤال سعيد و هو يكشر له قائلا:اللهم طولك يا روح هتشترى يا افندى و لا جاى تلعب أنت و ابنك؟

و طبعا عبد الحميد يضغط على يد سعيد و ينظر إليه بما معناه التزم مكانك ثم ينظر للبائع و يخبره انه سيشترى بالتأكيد و بكام الفانوس؟ بـ35.. ليه يا عم؟..هو كده لو كان عاجبك..ده حتى بينور و بيقول وحوى يا وحوى.

قرر عبد الحميد الانصراف ذاهبا لبائع آخر عليه التناكة التي اخبرناك عنها بالأعلى و قبل أن يفتح عبد الحميد فمه بكلمة باغته البائع بالنداء على فوانيسه قرررب قرررب اشترى الفانوس السحرررى مش بستين و لا سبعين بس هات خمسيين.

-خمسين ليه يا ابنى؟

-عشان بيغنى و ينور يا استاذ.

-على كده مش بيقطعوا عليه النور.

-انت جاى تهرج يا استاذ و لا تشترى؟

و يصف عبد الحميد شكل صاحبنا الذى أصبح مثل ريا و سكينة عندما قابلهما إسماعيل يس.

هنا قرر عبد الحميد أن يبعد عن هذا البائع و يغنى له و يذهب لآخر و آخر بينما المفعوص سعيد يمسك يده و يسأله عن معنى وحوى يا وحوى؟

و سمع السؤال رجل عجوز يرتدى طاقية بيضاء من التى تهدى لك عند عودة أحد محبيك من الحجاز يوعدك ربنا و يوعدنا.

و على ملامح هذا الرجل تبدو طيبة أهل زمان و أهل دلوقتى.. مش الراجل عايش وسطنا يبقى أكيد طيبته دي ماضى و حاضر و يطول عمره مستقبل إن شاء الله.

رحب الرجل العجوز المدعو عبد الكريم بمفعوصنا المبجل سعيد و قرر أن يشرح له معنى وحوى يا وحوى ذلك بعد أن نادى على واحد من صبيانه فى المحل كى يحضر له الشاحن و اتنين لمون.

فقلت لعبد الحميد يبدو أن نظرتك للبائعين تغيرت فقال لي طبعا.

أكمل عبد الحميد حكايته و أشار إلى دخول واحد من صبيان الحاج "عبكريم" -كما ينادونه دون نطق الـدال-و معه شاحن لاب توب و الحاج بسم الله ما شاء الله يضع اللاب أمامه و عبد الحميد يبتسم و لايصدق انه يستعمل هذا الكائن الجديد.

سعيد فى غاية السرور و يقول:شكلنا هنلعب نيد فور سبيد مع جدو..و هنا شخط عبد الحميد فى ابنه قائلا كما تستدعى مثل هذه المواقف دائما:عييييب يا ولد.

لكن الحاج"عبكريم" أشار إليه بعدم نهر الولد و سيبوا يلعب يا آخى و تعالى يا ابنى أقولك معنى وحوى يا وحوى.

هنا سألت عبد الحميد و انت إيه اللى دخلك المحل؟ فأجاب بانه تعب من كثرة اللف فأسعار الفوانيس نار و كأنه ذاهب لشراء نجفة لدرجة انه بدأ يصدق ان الوحوحة أتت منها كلمة وحوى و غير إن الولد طول ما احنا ماشيين يزن و يسأل عايز يعرف المعنى و مش شبطان فى الفوانيس زى بقية العيال فحمدت ربنا انه نجدنى بالراجل البركة ده و هو قاعد قدام محله و عنده فوانيس فقلت يمكن يعرف المعنى و على رأى المثل من فات قديمه تاه.

اقتنعت و طلبت منه ان يكمل فأخبرنى أن الحاج قعد سعيد على حجره و اللاب توب أمامهما و جوجل يرحب بكم و بحث الحاج عن اصل كلمة وحوى.

طبعا عبد الحميد كان فى نص هدومه لأنه مشترك فى النت و رغم ذلك لم يكلف نفسه بعناء البحث فيه.

و أشارت نتائج البحث إلى تعدد الروايات حول اصل كلمة وحوى و بدأ جدو عبكريم كما يناديه سعيد فى سرد هذه الروايات بأسلوب أبلة فضيلة فأخبره أن هناك رواية تقول إن وحوى يا وحوى أنها أغنية تنتشر فى رمضان ينشدونها بعد الفَطُور وهم يمسكون فى أيديهم بالفوانيس الملونة، وكلما قال المنشد عبارة أجابوه فى نفس واحد: (إياحة) كقوله: (بنت السلطان) فيردون: (إياحة)، (لابسة فستان) ( إياحة)..ده يا ابنى زى ما الموقع قال إن الكلام موجود فى كتاب الأستاذ / أحمد أمين: "قاموس العادات والتقاليد والتعابير المصرية" تحت عنوان "وحوى يا وحوى" و يكمل قائلا: "ولا أدرى معناها: هل هى كلمة مصرية قديمة أو هى مشتقة من "حوى يحوى"، أى عمل كما يعمل الحواة، بدليل قولهم: لولا فلان ما جينا، ولا تعبنا رجلينا، ولا حوينا ولا جينا....

هنا جلس يصفق سعيد و يغنى على هذا الرتم وحوى يا وحوى إيوحة، ثم ذهب الحاج عبكريم لموقع آخر على النت فأخبره أيضا أن وحوى يا وحوى أصلها فرعوني فكلمة (أيوح) معناها القمر، وكانت الأغنية تحية للقمر، وأصبحت منذ العصر الفاطمي تحية خاصة بهلال رمضان.

و على موقع آخر تجد  وحوي يا وحوي كلمة فرعونية بمعني ذهب أو رحل تقال عن وداع شعبات/شعبان واستقبال رمضان أي وحوي يا وحوي أي رحل شعبات وجاء رمضان ..هذا بمنطق الفراعنة لكن لا يعرفون شعبان و لا رمضان فنحن وظفنا الأغنية و معانى على الكلمات على شعبان و رمضان كما تقول الغنوة:رحت يا شعبان إياحة جيت يا رمضان إياحة.

و عبد الحميد فى قمة الفرح بهذه المعلومات و ابنه دخل فى حالة هدوء و الحاج عبكريم يتألق عبر لاب توبه.

و يخبرنا برواية ثالثة تقول فسر الموسيقار عمار الشريعى معنى وحوى يا وحوى بردها الى أصولها فى اللغة العربية و هو ( احوى او امتلك )... و في الأغنية: _ وحوى أى احوى إياها.... بمعنى امتلكها...يقصد بنت السلطان.

و بعد هذا التألق اخبرهما الحاج عبكريم هل تعرفان معنى حاللو يا حاللو؟هنا صاح سعيد قول يا جدو ما خلاص اللاب موجود و النت شغال فضحك جدو عبكريم و قال حسب الموقع اللى قدامكم كلمة "حالو يا حالو "أى "يا شيخ افرح "، أما معنى كلمة "وحوى" اقتربوا"، ومعنى كلمة" "ايوحا" "الهلال..شوفتوا معانى قد إيه.

و خد عندك كمان يا...أنت ما قولتليش اسمك إيه؟

-محسوبك عبد الحميد يا حاج عبكريم.

-عاشت الأسامى يا ابنى.

و أكمل الحاج بحثه و رواياته عن معنى وحوى يا وحوى قائلا إن جريدة الأخبار زمان نشرت إن المعنى يرجع للغة الهيروغليفية و كلمة وحوى معنا:افرحى ..أما إيوحة فهى أم أحمس الذى عندما طرد الهكسوس خرج المصريون فرحين يغنون له و يخبرون امه وحوى يا وحوى أيوحة..أى افرحى يا ايوحة.

عليا النعمة الراجل ده جدع يا عبد الحميد أنت بتقول إن كل كلامه موثقه من على النت يعنى مش كبر و خرف.

طبعا يا ابنى و قال لى لازم تستفيد من النت و ما تبقاش زى اللى دخل منجم كله ألماظ و ياقوت و ماس و راح خارج منه بطوبه.

و الله معاه حق حاج عبكريم ده بحر معلومات مالوش آخر و العهدة إذا لم تكن مصدقا على الراوى.

و بعد ان انهى جدو بحثه وإطلاعه سأل عبد الحميد هتشترى فانوس؟

و أجاب عبد الحميد كما اخبرني و حياتك فانوسين عشان نفرح أم العيال ثم دب يده فى جيبه لكنه لم يجد المحفظة التي وقعت فى يد المشرفين على المسجد الذى صلوا فيه المغرب و بمعرفة ما فى المحفظة من بيانات وجد أنها تابعة للأستاذ عبد الحميد فتمت إعادة المحفظة لبيته المجاور لحسن حظه للمسجد و ايضا لحسن حظه ان وقعت فى يد جاره..صحيح المال الحلال ما يضعش و حاللو يا حاللو.