ليلة جمعة

يا سلام لما تقوم ساعة صبحية و فطارك جاهز و المواصلات 100 فل و 14 و لا زحمة و لا حاجة.

و بينى و بينك كان عندى مشوار و حتما و لابد أعمله أحسن {جمعة} ياخد على خاطره.

المهم وصلت بسرعة و الحمدلله لكن لقيت الناس كلها بقدرة قادر واقفة تهيص مع تصفيق و صفافير و تنطيط و بينى و بينكم قلت أكيد جمعة كسب فى مسابقة و لا حاجة.

أصل جمعة صاحبنا غاوى من يومه يبعت و يتصل فى أى مسابقة يشوفها لكن الشركات كانت بتكسب رصيده و هو بيخسر فلوسه.

 ما علينا لقيت الواد جمعة و المدام معاه و خير اللهم اجعله خير معاهم واد سفروت صغير زى العسل و الناس فرحانة و عمالة تهنى و تبارك و جمعة و حبايبه يدوب على القد.

لكن الناس بتزيد كمان و كمان لدرجة إنهم بقوا سياح كمان و هنيالك يا جمعة فى ليلة الخميس مع حبايبك و اهلك و ناسك.

العدد بيزيد و جمعة نازل تنطيط و هيصة ولا هيصة محمد على بعد ما دبح المماليك و بالمناسبة كل سنة و أنتم طيبين العيد على الأبواب.

المهم سفروت جرى و ربنا يحميه بقاله فى الدنيا يومين لكن شكله عفريت ابن الايه.

و وقف واحد و قال لى:"هى العيلة دى كلها كده يا أستاذ،أخر شقاوة".

و لسه هنطق و أرد عليه فلحقنى بكلامه :"و بعدين تفتكر الواد ده هيسموه إيه؟".

و خد بالك بقى إنى سميت الواد سفروت أصل اسم النبى حارسه و صاينه واد يا "خلاصى عليه" أنا بأسمعهم بيقولوا كده و ساعات كمان يقولوا:"يتاكل اكل".. على أساس إن المحروس كيس فيشار هيتسلوا على حسه.

و راح صاحب السؤال من غير ما يسمعنى و شكله كان بيتسلى هو كمان و عايز يقول كلمتين و يمشى.

ده حتى جمعة راح يتسلى بحبة لب و سودانى و ساب الواد يلعب و أمه بتتفرج عليه و هو رايح و هو جاى و الواد المسفرت الزغطط عمال يصفر و الناس نازلة بالطبل و الأمن جه ع الصوت و بقى بيت جمعة و لا بيت الزرافة أيام زمان.

و بما إن الزرافة يرحمها الله فى حديقة حيواناتنا فأنا ادعوك من كل قلبى حتى ترى الباقى من الحيوانات و بالأخص جمعة.

نعم .. القرد جمعة .. لسه ربنا رزقه بواد سفروت من يومين و طيب الله أوقاتكم.

لحظة تأمل:

فين الحيوانات؟

هكذا ستقول بعد التجول فى حديقة الحيوان و اخشى أن يكون المقصود من اليافطة المعلقة هو الزائر صاحب السؤال.