كل يكتب على مزاجه،
و أقولك على حاجة انا حرامي،إيه مالك زعلت؟
أشوف الحاجة و اسمعها و أروح كاتبها علطول، القلم ما
حدش بيقدر عليه، و أنا شوفت مقال لبلال فضل أو زى ما تقول تخيل لحوار افتراضى له مع مذيعة فقلت أتخيل نفسى مكانه بنفس الموقف مع المذيعة.
ولحسن حظي جاءت
تجرى نحوى و انا فى طريقى لبيتى و في يدها ميكروفون و وراءها المصورين و المعدين و
استغربت أن القمر يتحرك من مكانه بل لزما و لابد أن ندور حوله.
ثبت قدمي على
الأرض فاتحا فمي بابتسامة و استمعت إلى المذيعة التي هنأتني بالشهر الكريم و دخول
العيد و طلبت منى أشارك فى برنامجها "اكسب جايزة".
و يا بركة دعاك
يا أمه فدائما ما تقول:ربنا يفتحها في وشك..و أديني هكسر الدنيا و أظهر في التليفزيون
و بعون الكريم ناخد الجايزة..بس يا خوفى لو الأسئلة طلعت من الثانوية العامة..حاكم
أنا كنت شاطر جدا و جبت ساعتها 60% لكن انا عارف إنهم ما ينفعوش ببصلة بس و حياتك
زمان كانت تدخل هندسة و طب،يبقى ما حدش أحسن من حد.
أفهمتني المذيعة
بعد معرفة اسمى أنها ستبدأ الحوار معى كأنى لم أراها و اعمل فيها "مندهش و
متفاجىء" بطلتها البهية.
يللا..3..2..1
..أعزائى المشاهدين فى وسط جولتنا بالشارع قابلنا مواطن بسيط هنتعرف عليه و يسعدنا
انه يشارك فى برنامجنا "اكسب جايزة" (صراحة المذيعة بتقولها و لا اللى
بينادى على بضاعة فى العتبة خصوصا وهى بتتكى على حرف الألف و الياء فى جايزة)..ما
علينا.
نتعرف عليك؟
ما انا لسه
قايله لسعادتك.
ستوب..إيه يا
ابنى احنا فهمناك إننا ما نعرفكش و لا شوفناك..أول ما المذيعة تسألك على اسمك
قولها.
من عنيا يا
استاذ.
تنظر المذيعة
للكاميرا و 3.. 2..1..نتعرف عليك؟
محسوبك معتز و اسم
الشهرة سعادتك ميزو..أه وحياتك الناس عندنا فى الحتة بيندهونى بالاسم ده..وأنا بأشكر
الفنان سمير غانم من هنا فى البرنامج لأن اسمى على اسمه فى المسلسل.
كل سنة و انت
طيب يا معتز و بتشتغل إيه؟
محسوبك بيشتغل
فى مجزر آلى..بس هو انتى قولتى البرنامج هيتذاع الساعة كام؟
ستوب..(يحمر وجه
المذيعة).
المذيعة خارج
التسجيل:يا معتز ما تتعبناش معاك..البرنامج بيتذاع فى ميعاده الساعة 9 كل يوم.بس تسمحلنا
نسجل معاك الأول من غير لخبطة و شيل عينك لو سمحت من عليا..بلاش فضايح و ركز فى
البرنامج.
عدم المؤاخذة ما
ينفعش أشيلهم لأن ده يقطع تركيزى و انا باصص أصلا للميكروفون اللى مركباه حضرتك مش
كفاية اللى فى إيدك؟
اللهم طولك يا
روح..يللا يا جماعة نجهز و انا هسألك يا معتز من أول شغلانتك.
المذيعة تنظر
للكاميرا: و بتشتغل إيه فى المجزر الآلى يا معتز؟
عدم المؤاخذة بأشتغل
"ذواكة"..أه ما تخافيش مش جزار سعادتك..هما بيدونى اللحمة اللى بتكون
بايظة و يأكلوها لمحسوبك عشان يطمنوا تنزل السوق و لا لأ..و بأقبض الحمدلله 220
جنيه.
بس؟
أه حلوين سعادتك،
غيرنا مش لاقى اللحمة،لكن أنا بأكلها مطبوخة و بلاش كمان،و عندك مثلا الناس فى
الحتة بيحسدونى على الشغلانة دى.
و بتقدر تعيش
بــ220 جنيه فى الشهر؟
الحمدلله رضا
أنا صاحى قدامك و لا لأ؟،طبعا صاحى يبقى عايش و 100 فل و 14 كمان.
ليك مصدر دخل
تانى؟
أه بأشتغل مع
بياع الجرايد اللى ع الناصية.
يعنى دورك إيه
فى الشغلانة دى؟
يا ست الناس،
الراجل صاحب الفرشة بيدنى كام جرنان كده إشى قومى على "مستكل" على حزبى
على كام مجلة،ألفهم و اوزعهم.
قصدك تلف على
رجليك و توزعهم؟
لا ألفهم و
اوزعهم.
إزاى؟
أقعد عند
الجنينة اللى على آخر الشارع العمومى، و اقطع ورقة ورقة و ألفها قراطيس للطعمية،مش
بذمة سعادتك أحسن ما الف بانجو زى ما بتاع الجرايد طلب منى؟
المذيعة خارج التسجيل:إيه
يا حضرة ده، بانجو إيه و نيلة إيه..و بعدين انا قلت لك ركز فى البرنامج و ابعد
عينك عنى.أكيد انت بتهرج فى كلامك اللى فات و أكيد لو حقيقى يبقى اترفدت من بتاع
الجرايد.
و حياتك
بهرج..ده انا حتى بأحب أهرج القميص من بره،ههههههه.
يحمر وجه
المذيعة رغم حمار الماكياج على وجهها و تقرر التسجيل.
المذيعة تنظر
للكاميرا:أنت متجوز يا معتز؟
شوفي حضرتك أنا
فى بنت كده متكلم عليها و أحب الناس كلها تعرف من خلال شاشتكم إني غرضي شريف و
الواد سيكا يطلع من الليلة دى عشان ما...
المذيعة خارج التسجيل:إيه
يا ابنى،أنت هتفضح البنت ع الهوا.
لأ مع سعادتك حق
سونيا ممكن تاخد برد.
اللهم ما طولك
يا روح،إحنا هنعيد تانى و يا ريت نكمل مطرح ما وقفنا و الحاجات اللى قالها تتشال
فى المونتاج.
المذيعة أثناء
التسجيل:يعنى الـ220 جنيه مكفينك و الحمدلله.
أه طبعا، عدم
المؤاخذة إحنا عيلة "عسامية" و الراجل يكون نفسه بنفسه،وأنا قلت قدامى
بتاع 40 سنة على عمرى و أكون جاهز بالستاير، و مش مستعجل على رأى الست شادية و
نبنى طوبة طوبة فى عش حبنا.
و تفتكر سونيا
هتستناك؟
أكيد زى ما سينا
استنت جنودها و عبروا و رجعوها،لازم سونيا تتحمل.
وإحنا من
البرنامج بنقولك ربنا معاك لأنك مثال للشاب المكافح.
أه و يا ريت بس
سيكا يعرف إن المنطقة فيها رجالة و البنت مهما حاول مش هيمس شعرها و باقوله ع الهوا،العب
بعيد يا سيكا.
ستووووب،إيه يا
عم معتز، ما ينفعش كده المدفع قرب يضرب و إحنا لسه ما دخلناش فى فقرة البرنامج
الأساسية.
عدم المؤاخذة
يعنى كل اللى سجلناه ده مش هيطلع؟
يا سيدى هيطلع
بس دى مفروض كانت مقدمة ليك عشان الناس تعرف اسمك و شغلتك و متجوز و لا لأ؟لكن انت
عطلتنا.
خلاص يا قمر ما
تزعليش نفسك أنتى خشى على أسئلة البرنامج علطول و انا مركز معاكى و حضرتك ما
تقاطعنيش و اللى ما يعجبكيش شيليه فى اللى حضرتك قولتى عليه المونفاخ ده.
اسمه المونتاج و
ركز فى البرنامج بس ارجوك.
المذيعة أثناء
التسجيل:أعزائى المشاهدين بعد ما اتعرفنا على معتز هندخل معاه فى أسئلة البرنامج.
ما هى أشهر ساعة
فى العالم؟
و الله أشهر
ساعة أعرفها هى ساعة الحكومة لأنها مشهورة ،ساعة تعجبك بروحين حبة صيفى و حبة
شتوى،حتى انا فى الصيف بألبس ساعة بيضة و فى الشتا سودا،و بعدين انا سامع إنهم بعد
رمضان هيرجعوها صيفى تانى،على الله بقى ألاقى الساعة البيضة حاكم شيلتها فى سحارة
الكنبة مع كام حتة صيفى متهربين من بورسعيد.
كيف يتنفس
الضفدع تحت الماء؟
أولا أحب اقولك
إنك عايزة تغلطينى و تضيعى الجايزة عليا، لأن الضفدع لا يتنفس تحت الماء،و
"الجونينة" اللى حكيت لك عنها بالليل بيطلع منها صوت ضفادع،يبقى زى
الغنوة ما قالت فى البحر سمكة..مش ضفدعة سعادتك،وبعدين الضفادع بتعيش كمان فى
"الشوربة" عند الجماعة الخواجات فى فرنسا،عشان تعرفى إنى "مثكف".
من القائل: ومن لا يحب
صعود الجبال..يعش أبد الدهر بين الحُفر؟
و الله هو الكلام صعب حبتين، بس
محسوبك ابو المفهومية،أكيد ده كلام المسئول فى الحى عندنا،لأنه سعادتك دايما يقول
لنا إنه فى خدمتنا و فعلا يحفروا الشارع نسألهم ليه فيقولوا مية،مع إنها و حياتك
بتقطع بالساعات و بعد ما يخلصوا سفلتة يجوا يحفروا تانى يقولوا "كهربه"
مع إنها برضه بتقطع،فعلى ده الحال شغالين سفلتة و فحت و ردم، و طبعا سيادته بينفذ
التعليمات اللى خدناها فى المدرسة زمان و إننا بلد زراعى يعنى نكره عيشة الصحرا
يبقى لا فيه جبال و لا يحزنون و كلام البيه يبقى صح عايشين فى حفر.
خلاص خلاص
السؤال اللى بعد كده، ما الفرق بين قناة السويس و قناة استاكيوس؟
شوفى حضرتك،قناة
السويس بتعدى منها المراكب و السفن "العملاكة" و بتجيب فلوس شىء و شويات
اللهم لا حسد،لكن ما أعرفش بقى فى فناة استاكيوس لو بتجيب فلوس بتتوزع صح ولا لأ.
تعرف إيه عن
سانتا كلوز؟
ممكن تعفينى من
السؤال ده.
ليه؟
عشان إحنا فى
رمضان.
ما انا عارفة بس
مال رمضان بالسؤال؟
عشان دى شكلها
ماركة مشروب منكر لمؤاخذة و كفاية عليا "فانتة" مصيلحى.
ما علينا ندخل
على السؤال اللى بعده،كم يبلغ طول قمة جبل إيفرست؟
بالصلاة ع النبى
انا شوفته بعنيا على قناة "شيكوجرافك" لما كنا مستنين الماتش ع القهوة،
حتى بالأمارة من اطول "الكمم" فى العالم.
و يا ترى طولها
كام؟
لو قلنا إن
الدكتور نزيف يجى بتاع مترين بالصلاة على حضرة النبى يبقى اضربى 5000 فى طول
الدكتور.
متى أنشأ المتحف
المصرى؟
الكلام ده متسجل
سعادتك؟
أيوه يا
معتز،ليه؟
ما بلاش الموضوع
ده.
ليه؟
إنتى عارفة الجو
لبش اليومين دول من المتاحف بعد زهرة البتاع ده ما راحت، و بينى و بينك الواحد
خايف يعدى قدام متحف و لا يجيب فى سيرته ياخدوه و يشيلوه القضية، و بعدين انا عايز
أخد رأيك فى حاجة.
اتفضل.
تفتكرى اللى خد
اللوحة دى حد من ازواج زهرة؟
لا بجد كتير و
ربنا كتير اللى بتعمله ده،واقف من الصبح معطلنا و مضيع علينا تسجيل مع ناس
تانية،حرام عليك.
الله،ليه كده يا
مدام؟
آنسة لو سمحت.
ما تزعليش،حتى
فال حلو عليكى فى الأيام المفترجة دى.
متشكرة يا
سيدى،بص لولا إن الوقت متأخر و مفيش غيرك فى الشارع و مش عارفة ليه يعنى،خلينا
نكمل الحلقة عشان نلاقى حاجة نذيعها.
عنيا
لحضرتك،كملى سؤلاتك.
لا ابعد عينك
بعيد و ركز و جاوب أرجوك إجابة مفيدة و اظن السؤال الجاى هتعرفه.
المذيعة اثناء
التسجيل:أكمل العبارة التالية:لو لم تكن مصريا لوددت أن تكون إيه يا معتز؟
أن أكون معتز، و
لا أنت عايزانى اطلع اقول زى الأغنية انا مش انا و قوليلى انا مين يا مرايتى،و انا
مش عارفنى و ابقى و لا اللى "فكد" ذاكرته عدم المؤاخذة.
أنا أقصد مصر
بتمثل ليك إيه؟
مصر عمرها ما
بتمثل إلا التمثيل المشرف خصوصا فى مسابقات ملكات الجمال اللى بتخلينى اعرف قد إيه
مصر زى ما بتوع "الثكافة" بيقولوا ولادة، و حياتك بأعرف إن البلد لسه
حلوة خصوصا فى التصفيات النهائية تلاقيهم لابسين من غير هدوم كده و
"سيكان" إيه و شعر إيه و جسم ملبن كده زى الكتاب ما بيقول، و كفاية بقى
الواحد صايم يا حضرة "الموذيعة".
أرجوك المدفع
ضرب و أنت جنب بيتك و إحنا هنختم معاك.
ليه
سعادتك؟تنورينا و تفطرى معانا انتى و اللمة الحلوة دى.
شكرا،بس فى جملة
واحدة ممكن تقولى مصر بالنسبة لك إيه؟
مصر بالنسبة لى
زى سونيا.
